Brakke ken van brug bou

Om ‘n brug te bou uit houtstokkies en gom – en een wat daarby ‘n gewig en ‘n half kan hou – is die uitdaging waarmee hoërskoolspanne onlangs geswoeg het tydens die finale van die AECOM-SAICE Internasionale Brugboukompetisie. Die span van Hoërskool Brackenfell in die Kaap het vanjaar as wenners uit die stryd getree.

Die kompetisie is vanjaar vir die agste agtereenvolgende keer in Sandton in Johannesburg  gehou, nadat streeksuitdunne landswyd plaasgevind het. Dit is egter al reeds 24 keer aangebied.

Die wenspan van Hoërskool Brackenfell in aksie tydens die jaarlikse brugboukompetisie: Foto: SAICE

Die wenspan van Hoërskool Brackenfell in aksie tydens die jaarlikse brugboukompetisie: Foto: SAICE

Dit word jaarliks deur die Suid-Afrikaanse Instituut vir Siviele Ingenieurswese aangebied om aan leerders praktiese blootstelling te gee aan die uitdagings van ‘n loopbaan as siviele ingenieur. Negentien spanne van  Suid-Afrika, Namibië, Swaziland en Zimbawe het deelgeneem.

Die beoordelaars het punte toegeken vir die estetika van die ontwerp, asook hoeveel die konstruksie geweeg het. ‘n Finale en belangrike toets was ook om te kyk hoeveel gewig die struktuur kan dra!

Die wenspan van Philip Kleynhans, Dewald Mouton en Niël Oosthuizen het ‘n algehele punt van 229.7 ontvang, en hul brug kon 155.2kg dra. Die drietal is almal Graad 11-leerders van Hoërskool Brackenfell.

Al wat hulle gehad het om mee te werk is 25 houtstokkies, elkeen 4mm dun, gom en ‘n stuk tou. Daarby het die bou van hul struktuur alles teen tyd geskied.

Die Brakke se brug is vierde uit die 19 spanne getoets vir drakrag – en daarna het die wag gevolg om te kyk of ‘n ander span se ontwerp dalk beter is.

Volgens spanlid Dewald Mouton was die moeilikste deel van die hele proses om seker te maak dat hul brugontwerp pas by die vereistes van die kompetisie. “Die jaar se kompetisie se vereistes het die brug baie laag gemaak en wyd, wat nie ‘n baie goeie kombinasie is nie, want hoe laer die brug is en hoe langer hoe meer spanning sit dit op die brug self,” verduidelik hy. “Dit het gemaak dat die ontwerp van die brug redelik moes verander van waaraan ons gewoond is en geoefen het.”

Die leerders het elk meer as R2000 aan prysgeld verdien, en het ook elkeen ‘n I-Pad Mini 2 ontvang.

Die Brakke se oorwinning was ‘n besonderse hoogtepunt vir hul ingenieursgrafika en -ontwerponderwyser, Johan Nieuwoudt. Hy het al twintig spanne ingeskryf vir dié kompetisie. “So hy ken al sy storie en het al die gereedskap,” vertel Mouton oor hul voorbereidingswerk.

“Hy het toe vir ons houtjies, wat soortgelyk is aan dié wat ons in die kompetisie gebruik, gegee,” vertel hy. Die houtjies is van dennehout en is 4mm x 4mm. “Ons gebruik ‘liquid filler’ as gom en koeksoda om dit vinniger te laat hard word.”

Dewald en sy spanmaats het Saterdae geoefen aan verskillende ontwerpe om te kyk watter die beste werk.

Die span van Hugo Beuken, Suné Beuken and Kiara Bramley van Harriston Skool in Harrismith was tweede. Hul brug kon 112kg dra, en het ‘n algehele punt van 174 ontvang. Die jongste deelnemers aan die finaal was ‘n span van Domino Servite Skool in Pietermaritzburg. Dié span, bestaande uit Jacob Allen, David Bosman en David Pop, het ‘n netjiese derde plek ingeneem met ‘n brug wat 80.1kg kon dra.

Volgens Mary Ashpole van die Suid-Afrikaanse Instituut vir Siviele Ingenieurswese het hulle die kompetisie die eerste keer in 1991 aangebied . Daardeur word hoërskoolleerders kans gegee om hul liefde vir wiskunde en wetenskap binne ‘n ingenieurskonteks toe te pas. Hulle kry daardeur dus ook waardevolle blootstelling aan die eise van die beroep.Sy reken dis die Instituut se mees suksesvolle werwingsgeleentheid.

 

AdminBraai

SciBraai, a proudly South African NPO dedicated to science journalism, communication and outreach. SciBraai began on Heritage Day 2013 - Anina Mumm and Engela Duvenage in 2013 launched the website, scibraai.co.za, to feature stories about South African research, technology and innovation, and the people behind the discoveries. This blog welcomes all South Africans to go behind the scenes of local science and exploration endeavors. It’s a place to share stories about the scientists themselves and the interesting, little-known activities that are often left out of research journals. A place to learn more about the stuff that makes South African science and its people tick. A place to feel inspired about what South Africans are discovering on home soil and abroad. Because local is lekker, no matter what language you use. SciBraai's following has grown in the past years, and we are now on Facebook, Twitter and Instagram. We've also begun organising real-life braai's where we share round-the-fire stories about South African science and scientists.

More Posts

Follow Me:
TwitterFacebookGoogle Plus